ਖ਼ਬਰ ਨਹੀਂ..ਤੂੰ ਕਿੱਥੇ ਹੈਂ ?
ਕਿਵੇਂ ਹੈਂ ?
ਮੈਨੂੰ ਯਾਦ ਵੀ ਕਰਦਾ ਏਂ ਜਾਂ ਨਹੀਂ..?
ਤੁਰ ਰਹੀ ਆਂ
ਓਹਨਾਂ ਹੀ ਰਾਹਾਂ 'ਤੇ..
ਉਸ ਜਗ੍ਹਾ ਵਾਰ ਵਾਰ ਆ ਕੇ
ਕਿਓਂ ਖਲੋਣਾ ਪੈਂਦਾ ਏ ?
ਹਾਲਾਤਾਂ ਦਾ ਗੇੜ
ਮੇਰੀ ਕੱਚ ਰੂਹ ਨੂੰ
ਕਿਓਂ ਰੌਂਦ ਰਿਹਾ ਏ ?
ਟੁੱਟ ਚੁੱਕੀ ਆਂ..
ਪਤਾ ਨਹੀਂ ਕਿੰਨੀ ਦਫ਼ਾ..
ਕਿੰਨੇ ਟੁਕੜਿਆਂ 'ਚ..
ਹੁਣ ਹੋਰ ਕਿੰਨਾ ਕੁ
ਤੋੜਨਾ ਏ ਮੈਨੂੰ ??
ਤੂੰ ਕਦੇ ਕਹਿੰਦਾ ਸੀ
ਮੈਨੂੰ ਪਲਕਾਂ 'ਤੇ
ਬਿਠਾ ਕੇ ਰੱਖੇਂਗਾ..
ਕਿੱਥੇ ਨੇ ਤੇਰੀਆਂ ਓਹ ਨਜ਼ਰਾਂ ??
ਆਪਣੀਆਂ ਪਲਕਾਂ 'ਤੇ
ਬਿਠਾਉਣ ਦੀ ਗੱਲ
ਤਾਂ ਕਹਿ ਗਿਓਂ..
ਕਦੇ ਮੁੜਕੇ ਤੱਕਿਆ
ਇੱਕ ਵਾਰ ਵੀ
ਕਿ ਮੈਂ ਕਿਸ ਹਾਲ 'ਚ ਆਂ...??
ਜਿਓਂਦੀ ਵੀ ਹਾਂ ਜਾਂ.............??
ਥੱਕ ਚੁੱਕੀ ਆਂ
ਤੁਰਦੇ ਤੁਰਦੇ..
ਆਪਣੇ ਸੀਨੇ ਨਾਲ
ਲਗਾ ਲੈ ਚੰਨਾ..
ਮੈਂ ਤੈਨੂੰ ਛੂੰਹਦਿਆਂ ਕੋਈ
ਚੁਭਨ ਨਹੀਂ ਦੇਣੀ..
ਤੇਰੀ ਸਹੁੰ..ਠੰਢੀ ਰੇਤ ਹੋ ਚੁੱਕੀ ਆਂ..
ਤੇਰੀ ਹਿੱਕ ਨਾਲ ਲੱਗ
ਮੈਨੂੰ ਬਹਿਸ਼ਤ ਮਿਲ ਜਾਵੇਗੀ...!!
ਹਾੜਾ ਏ ਚੰਨਾ....
ਮੈਨੂੰ ਰੇਤ ਤੋਂ ਹਵਾ ਹੋ ਲੈਣਦੇ..
ਹੁਣ ਹੋਰ ਨਹੀਂ ਤੁਰਿਆ ਜਾਂਦਾ....!!!
ਨਿਵੇਦਿਤਾ
21st August 2011
No comments:
Post a Comment